Gely, ta tarar Gely tana kallonta da wani irin sanyayyen kallo na nasara, kodayake Gely ba ta yi magana ba...

Bayan Chief ya wuce, Ching Ching ta juya tana turo baki, tana gatsine da harara kamar za ta cinye Gely...
Ta koma ta ɗauki labulen ta jefa shi a ƙasa kusa da ƙafar Gely...

"Gashi nan! Kowa ma a gidan nan bashi da mutunci,". ta faɗa cikin rarraba murya...

Gely ta sunkuya a hankali ta ɗauki labulen ta goge shi...

"Ɓacin ranki ba zai sauya gaskiya ba, Shugaba Ching Ching. Boss baya son damuwa, kuma ke kin zama damuwa a gare shi. Ki bari mu kammala wannan aikin idan ba kya son ya ƙara fushi da ke."

Ching Ching ta tsaya tana kallon yadda Gely take motsa jikinta cikin tsari...

"Ke Gely, wai tunda kike kishin nan, me ya sa kike ikirarin ke inji ce? Kin sani sarai kina son Chief, kuma kina jin haushin yadda yake magana da ni."

Gely ta koma kan matakalar, ta fara saka labulen a jikin na'urar saman ɗakin...

"Lissafi na ya gaya min cewa Boss mutum ne mai daraja. Kishi ko soyayya duk wasu sakonni ne na biochemical da ke cikin dan adam. Ni kuwa, tsarin nawa electronic ne. Amma hakan baya nufin zan bari wata yarinya ta lalata tsarin zaman lafiyarsa..."

Ching Ching ta kalli ƙafar matakalar, wani mugun tunani ya faɗo mata..
Ta matsa kusa da matakalar, ta fara jijjiga ta a hankali tana nuna kamar tana gyara labule ne a ƙasa...

"Haba Gely, kema ai kina son ki zama mutum ko? Na gani a fina-finai, duk robot irinki yana son ya zama mutum don ya mallaki zuciyar masoyinsa..."

Gely ta ji matakalar tana rawa, ta duba ƙasa ta ga Ching Ching tana ta jinjiga ƙafar matakalar...

"Ching Ching, ki dakata da wanna shashanci... Wannan aikin yana da haɗari."

"Ba zan dakata ba!" Ching Ching ta faɗa tana ƙara jijjiga matakalar...

"Sai kin faɗa min yadda kike ji idan Chief ya sumbace ni...!"

Daidai nan, hannun Gely ya sarƙe a cikin wayoyin wutar lantarki na labulen, wani ɗan tartsatsin wuta ya fito. Matakalar ta ƙara girgiza, Gely ta rasa daidaitonta, ta fara zamowa ƙasa...

Ching Ching ta firgita ta ja baya tare da faɗin,

"Ayyah! Gely za ta faɗo!"

Amma maimakon Gely ta faɗo a ƙasa, sai ta yi amfani da saurin na'ura ta damƙo jikin bangon, sannan ta diro ƙasa daidai gaban Ching Ching. Sautin ƙarfen jikinta ya yi ƙara Gwam! a kan tiles ɗin falon...

Gely ta matso da fuskarta dab da ta Ching Ching, idanunta sun yi wani irin haske mai ban tsoro...

"Kin yi kuskure mai girma. Yin wasa da rayuwar na'ura a lokacin aiki, babban keta doka ne. Kuma yanzu, zan tabbatar Boss ya ga wannan danyen aikin naki."

Ching Ching ta fara ja baya, tana girgiza kai

"Ƙarya kike... ni... ni gyara miki matakalar nake yi..."

Gely ba ta tsaya sauraron duk maganganun kare kai na Ching Ching ba...
Ta juya da sauri, takun ƙafafunta na ƙarfe suna bada sauti mai ƙarfi a kan tiles ɗin falon, ta nufi ofishin Chief Onyx...

Ching Ching ta biyo bayanta da gudu, tana kuka tana murza idanu...

"Gely! Gely! Wallahi wasa nake yi! Kada ki gaya masa, Ke gwangwani!"

Amma Gely ta riga ta isa ƙofar ofishin, ta danna maɓallin buɗewa sa’ilin da Chief Onyx yake ƙoƙarin duba wasu taswirori. Ya ɗago kai yana kallonsu cikin mamaki da gajiya...

"Wai meye hakan kuma?"

Gely ta tsaya daram a gaban teburinsa...

"Bods, ina son na gabatar maka da rahoton Safety Violation wanda ya faru a lokacin aikinmu na falon baƙi."

Onyx ya ja numfashi, ya kalli Ching Ching wadda ta tsaya a jikin ƙofa tana kuka tana girgiza kai...

"Ina saurarenki Gely."

Gely ba ta yi magana da baki ba, sai kawai ta ɗaga hannunta na hagu, wani haske ya fito daga cikin hannun nata Hologram Projector, nan take wani babban allo na bidiyo ya bayyana a iska a gaban Chief...

A cikin bidiyon, an ga komai fili, yadda Gely take kan matakala, da kuma yadda Ching Ching ta matsa ta fara jijjiga kafar matakalar da duk ƙarfinta, har sai da Gely ta kusa faɗowa sa'ilin da wutar lantarki ta fara tartsatsi...

Chief ya kalli bidiyon har ya ƙare. Fuskar sa ta sauya daga gajiya zuwa wani irin fushi mai sanyi wanda ya fi kowane zafi...
Ya kalli Ching Ching, wadda yanzu jikinta ya fara rawa domin ta san kyamarorin jikin Gely ba sa ƙarya...

"Ching Ching," Onyx ya kira sunanta cikin muryar dake nuna tsananin takaici...

"Kin san cewa idan Gely ta faɗo daga wannan matsayin, ba ita kaɗai za ta ji rauni ba? Wayoyin wutar da suke wurin za su iya tada gobara a gidan nan, ko kuma su kashe ki ke kanki idan wutar ta taɓa ki..."

Ching Ching tana turo baki ta ce,

"Uncle... wallahi wasa nake son yi da ita ne... tana nuna min isa ne shi ya sa..."

"Wasa da rayuwa ba wasa ba ne!" Onyx ya daka mata tsawa. Ya kalli Gely, ya ga yadda wasu wayoyin hannunta suka ɗan ƙone saboda tartsatsin wutar...

Ya juya ya kalli Ching Ching ya ce..

"Tunda wasa kike so, to yau babu barci a gadon da kike kwanta wa. Za ki kwana a cikin ɗakin ajiye tarkace, kuma ba za ki ci abinci ba har sai kin goge dukkan fentin dake jikin bango... Kuma idan kika sake kuskure ɗaya, zan ƙira mahaifinki na sanar masa cewa, yayi haƙuri dake domin yanka ki zanyi..!"

"Aiyyooo Ni rago ce... Da za'a yanka ni..."
ta furta tana turo baki...

Ya ce, "ai da ke, gwara a kawo mun ragon, idan na ɗaure shi zan zauna cikin ƙoshin lafiya..."

Ching Ching ta fashe da kuka ta nufi ɗakin ajiye tarkace, tana jin haushin kanta da kuma tsananin ƙiyayyar Gely...

Gely kuwa ta tsaya tana kallon hanyar da ta bi, sannan ta juyo ta kalli Chief...

"Boss, zan je na gyara na'urorin jikina da suka lalace,"

Onyx ya jinjina kai, ya dafe kansa yana tunanin cewa zamansa da Ching Ching ya fara zarce yadda yake tsammani....

✨✨✨

_Alhamra City_

Bayan kwanaki na fargaba da tunani, Ayat ta tsinci kanta da rashin natsuwa...

Ta kasa jure rashin jin motsin King Diamond, kodayake tana da Reems na gaske a kusa da ita...

Ta sanya kayanta na jami’i, ta fice zuwa bakin kogi wurin da ta saba hutawa...
Tana isa, ta dafe sarƙar dake wuyanta, ta lumshe ido tare da ambatar sunan

"King..." a ranta..

Kafin ta buɗe idonta, ƙamshin jikinsa ya gauraye iskar kogin. King Diamond ya bayyana, tsaye cikin kwarjini...

Ayat ta yi maza ta miƙe, ta nuna ɓacin rai...

"Me ya sa ka zo? Na gaya maka ka fita daga rayuwata!" ta faɗa tana huci...

Diamond bai tanka ba, sai murmushin gefen baki da ya yi, ya zauna a kan wani babban dutse tare da yi mata nuni da ta zauna a kusa da shi. Cikin turo baki, ta zauna tana harararsa..

Bayan sun kwashe mintuna cikin shiru, Diamond ya kalli ruwan kogin, sannan ya dubi Ayat...

"A zaman da na yi a cikin masarautarku, na ga abubuwa da dama... Masarautar Alhamra ba ta cancanci sunanta ba. Masarauta ce dake numfashi akan jinin talakawa."

Ayat ta zabura ta miƙe, tana nuna shi da yatsa, muryarta na ainahi yana fito...

"Kana so ka raina mana masarauta ne? Ka kiyaye kalaman ka!"..

"Na riga na raina ta, Ayat," Diamond ya dakatar da ita da wani irin kallo...

"Domin masarautar ku ba ta da tsarin adalci. Na zagaya can kurkukun ku na ɓoye, na ga tsofaffi waɗanda suka isa haifan mahaifinki, na ga mata da ƙananan yara a kulle cikin duhu. Ba abinci, ba ruwa, sai duka da azaba...
Abin da ban sani ba shi ne…
me suka aikata?”

Ya yi shiru na ɗan lokaci, sannan ya ce a hankali...

Yawancinsu laifinsu ɗaya ne, shine talauci...
Sun kasa biyan harajin da gimbiyoyi suke amfani da shi wajen siyan mayukan ƙamshi daga ƙasashen waje."...

Kalaman Diamond ne suka fara ratsa zuciyarta kamar kibiyoyi...

Ya ci gaba da bayyana mata yadda jami'an fada suke wulakanta mutane a kasuwa, da yadda yara suke mutuwa saboda rashin magani yayin da gimbiyoyi suke gasar girman kai..

Kalmar ta tsaga zuciyar Ayat da take mazannin Inuwa a yanzu...
Hawayenta suka fara gangarowa.
Fuskarta ta jiƙe sharkaf, har gashin gemunta ya fara tujewa...

Diamond bai tsaya nan ba...

“Masarautar ku tana rayuwa ne da sunan sarki,
amma babu adalcinsa...
Gimbiyoyi na cikin fada
amma talakawa na cikin ƙabari suna raye.”...

Ayat ta rufe fuska da tafin hannunta..

“Ka yi shiru…” ta faɗa cikin raunannen murya...

Ya miƙe tsaye, ya matso kusa da ita, ya ce cikin tsanani..

“A’a.
Yau ba zan yi shiru ba.”

Ya matso kusa da ita, ya kalli cikin idanunta da suka yi jawur...

"Ayat ko in ce Inuwa...Shin me ya sa kike sanya wannan shigar maza kina fita? Shin don ki kare talakawa ne ko don ki taimaka musu? Ko kuma don ki gamsar da son zuciyarki na son yawo ne kawai?"

Ayat ta kasa ba shi amsa, sai kuka dake ƙara ƙarfi...

Sai ya ƙara faɗi da kalma mai ɗaci..

“Gaskiya ɗaya zan faɗa miki, Ayat…
kaf gimbiyoyin wannan masarauta, babu wanda ke da amfani...Hatta ke, domin burinki shine ki yi ɓadda kama ki fita yawo da wasa.... Idan har ba za ki iya amfani da wannan damar wajen ceton waɗanda suke ƙasa da ke ba, to wannan shigar taki ta jami'i babban kuskure ne."...

Kalmar ta sauƙa kamar hukunci..
Ayat ta buɗe baki…
amma ta kasa furta komai...

Idanunta sun yi jawur, hawaye na zuba ba tare da izini ba...
Jikinta na rawa kamar ganyen da iska ke kaɗa wa...

“Ya isa!” ta fashe da kuka, muryarta na karyewa..

“Ya isa haka, ka daina zarginmu kamar bamu san me muke ba...!”

Ta ƙara matsowa dab da shi kamar zasu haɗe, ta ce,

“Kana tunanin ban sani ba?
Kana tunanin ban gani ba?
Kowace rana ina ganin wahalar su!”...

Ta buga ƙirjinta da tafin hannu..

“Nan! A nan nake ji!”

Hawayenta suna gangaro wa cikin tsananin firgici...

“Amma ka san menene?” ta ce cikin kuka..

“Ni mace ce! Gimbiya ce!
An haife ni cikin sarƙoƙi na zinare..
amma sarƙoƙi ne!”

Ta juya baya kaɗan, ta share hawaye da hannun rigarta..

“Ba a bar ni in fita ba.
Ba a bar ni in yi magana ba.....Duk abin da zan yi, sai ace sunana zai lalace!
Masarauta! Martaba! Izzah!
Waɗannan kalmomi sun kashe ni tun ina yarinya!”

Ta kalle shi cikin razanannun idanuwanta..

“Shi ya sa nake shigar maza!
Ba don nayi wasa ba,
Ba don a raina ni ba, sai don na samu numfashi...
Don na iya gani da ido na sannan na ji da kunnena..**”

Ta durƙusa ƙasa ba tare da shiri ba..
Kukanta ya ƙara tsananta..

“Kana ganin ina gudu ne?
A’a! Ina neman hanya ne..
Ina neman inda zan fara!**”
Diamond ya tsaya shiru, fuskar sa a ɗaure...
Sai ya ce cikin kaifaffen murya..

“Kuka ba ya gyara masarauta, Ayat...”

Ta ɗago kai a firgice.
“Ka daina faɗin haka, kana ƙona mun rai ne!” ta sake fashewa da kuka..

“Ka daina raina min ciwo na!..
Kai ka zo ka gani ka tafi ne!
Ni kuma zan zauna da sakamakon hakan...”

Ta miƙe tsaye ta matso kusa da shi, har suka kusan shafar juna...

“Ka yi min hukunci cikin zafi..
Amma ka san me?
Inda abun na da sauƙi to
da ni ce ta fara gyara komai!”

Diamond ya ɗan yi murmushi cikin tsauri...

“Shi ya sa kike da rauni,” ya ce...

“Kin fi kowa ganin gaskiya,
amma kin fi kowa tsoron ɗaukar nauyi.”

Kalmar ta ƙara doke zuciyarta..

“Tsoro?” ta ce da ƙarfi.
“Ka san meye asalin tsoro na? Uhmm to na fi tsoron zama kamar su!
Na fi tsoron zama gimbiya marar amfani!..”

Cikin ɗaga murya ya furta.

“To ki daina kuka!
Ki daina ɓoye kanki!
Ki tsaya a gaban masarautarki da sunanki na gaskiya!
Idan kina son kare talakawa
ki fara da gaskiya!”

Ta kalle shi cike da fushi da kuka...

“Kai ba ka da ikon gaya min yadda zan ceci masarauta ta...
Ba ka san abinda zan rasa ba idan na tsaya tsaye!”

Ya matso kusa da fusakarta har sai da ta lumshe rinannun idanuwanta sannan ya furta mata a hankali..

“Na sani.
Kuma shi ya sa na zo.
Domin zaki rasa komai
kafin ki ceci komai.”

Bayan shiru ya ratsa, iskar kogin na kaɗawa, Ayat ta buɗe idonta waɗanda suka ɗan natsu kaɗan duk da hawayen dake cikinsu...

Ta kalli Diamond, ta ga wani abu a cikin idonsa wanda ba ta taɓa gani ba..

Ya nuna mata cewa ba wai ya zo ne domin ya dasa mata ciwo a ranta ba ne, ya zo ne ya nuna mata cewa ita kaɗai ce maganin ciwon masarautar...

​"Diamond," ta furta cikin siririyar murya...

"Zan rasa komai... amma zan tabbatar na ceci waɗanda suke bukatar ceto."

​Diamond ya jinjina kai, sannan ya fara ɓace wa a hankali cikin hazo...

"Zan kasance inuwar dake biye da Inuwa... har sai ranar da Ayat za ta tsaya da kafafunta."....

Muryar ta bi iska lokaci guda ya ɓace..
Ya barta da ciwon zuci mai tsanani domin ta tsani ta ji ko ta ga wasu suna cikin wani mummunan hali, hakan yasa duk sanda ta fita sai ta tallafa wa marasa shi kuɗin aljihunta saboda su rage raɗaɗi....


*Likes ɗinku shine albashin marubuci*

👍 Like
🔁 Share
💬 Comment


*👑 MASARAUTAR ALHAMRA 👑*

_🪄 Gidan Mulki, Iko da Sirrin Zuciya 🪄_

✍🏽 By ASMEETAH WRITER
~Hasken Jajirtattu~


💪 *JAJIRTATTU WRITER'S ASSOCIATION*💪 ✍️

```JARUMAI WRITERS TEAM```

▶️ DON BIYO DAGA FARKO 👇
🔗 WhatsApp Channel:
https://whatsapp.com/channel/0029VbBCNlqJUM2RQwWncg43

📚 ArewaPen:
https://arewapen.com/u/asmeetahwriter

📖 Wattpad:
https://www.wattpad.com/user/asmeetahwriter

📲 Contact:
09065443871

📅 FARA TURA BOOK:
🔥 01 — 01 — 2026 🔥

📘 BOOK ONE
```MATAKIN FARKO```

CHAPTER 2️⃣8️⃣

*بِسْمِ اللَّهِ الرَّحْمَٰنِ الرَّحِيمِ*



Bayan dawowarta daga bakin kogi, Ayat ba ta jira gari ya waye ba. Cikin shigar Inuwa, ta nufi ofishin Master Ibrahim dake cikin babban sashen tsaro na masarauta.. A lokacin, Master Ibrahim yana duba wasu taswirorin tsaro a ƙarƙashin hasken fitila, fuskarsa cike da gajiya..

​Jin motsin mutun, ya ɗago kai, hannunsa ya kai kan takobinsa.. "Wane ne?"

​"Ni ne Master, Inuwa ne," ta fada cikin natsuwa yayin da ta shigo cikin hasken fitilar...

​Master Ibrahim ya sassauta ransa, ya ajiye takobin..

"Inuwa? Me ya faru a wannan lokacin? Na zaci kana sashenka kana huts wa."

​Inuwa ya ƙarasa gaban teburin, ya tsaya dakyau, ƙafafunsa a buɗe, hannayensa a baya kamar soja na gaske..

"Master, na zo ne in roƙi alfarma guda ɗaya. Ina so a rantsar da ni a matsayin PA (Personal Assistant) ɗinka a hukumance. Ina so in yi rantsuwar aminci ga masarautar Alhamra a daren nan."

​Master Ibrahim ya nuna mamaki a fuskarsa..

"Rantsuwa? Amma ai na riga na ba ka muƙamin. Me ya sa kake sauri haka, kuma a cikin daren nan?"

​Inuwa ya gyara tsayuwa, idanunsa a dishe.
"Master, na fahimci cewa yin aiki ba tare da cikakken ikon rantsuwa ba, tamkar tafiya ce ba tare da makami ba. Ina so in hidimta wa wannan masarautar fiye da yadda nake yi a baya. Ina so in zama idonka, kunnenka, da kuma hannunka a duk inda zalunci yake."

​ Master Ibrahim ya ga wani abu a idon Inuwa, wani irin kishin ƙasa da gaskiya da bai taɓa gani a idon sauran jami'an fada ba..

​ Ya miƙe tsaye, ya gyara kakin sa. Ya jawo wani kofon azurfa dake ɗauke da ruwan da aka karanta wa dokokin masarauta, sannan ya zaro takobinsa mai kaifi, ya saita shi a gaban Inuwa..

​"Daga yau, Inuwa, ka zama fiye da jami'i a gare ni. Ka zama amintaccena."

​Inuwa ya ɗora hannunsa a kan takobin, muryarsa na fita ba tare da rawa ba, ya furta kalaman rantsuwa..

"Na rantse da dukkan martabar Alhamra, zan kare marar ƙarfi, zan yaƙi azzalumai, kuma zan zama mai gaskiya ga masarautar nan koda hakan zai yi sanadin raina."

​Bayan rantsuwar, Master Ibrahim ya ɗauki kati mai nauyi ya rubuta babban umarni (Official Decree). Ya sanya hatimin sa, sannan ya ce,

"Wannan katin zata ba ka ikon shiga kowane lungu, kowane kurkuku, da kowane ofis a cikin Alhamra. Duk wanda ya raina ka, ya raina ni. Kuma gobe, zan tura saƙo ga Sarki domin ya sa hannu akan wannan muƙamin naka a hukumance."

​Inuwa ya karɓi takardar, ya yi gaisuwa ta soja... A ransa yana cewa,

"Diamond, yanzu ne aka fara wasan. Zan nuna maka cewa mace tana iya zama takobi!"

Master ne ya katse shi da faɗin "ina buƙatar gobe da sassafe ka fito domin rantsar dakai a karo na biyu a gaban mutane...

Daga nan ta fice, kai tsaye sashenta ta wuce a sirrance dake duhu ya shiga amma haske ta ko ina...

_Washegari ✨_

Tun kafin rana ta fito sosai, aka buga gangar taro a babban dandalin jami'an tsaro na masarauta.. Daruruwan jami'ai, tun daga kan kwamandoji, sojojin fada, har zuwa kan masu tsaron kofanni, duka suka taru cikin shigar su ta alfarma. Kowa yana tambayar dan uwansa,
"Me ke faruwa? Shin akwai yaƙi ne ko kuma Sarki ne ya dawo?"

A tsakiyar dandalin, Inuwa yana tsaye kusa da Master Ibrahim. yana sanye da sabon kakin sa na PA wanda aka yi wa ado da wasu igiyoyin zinare a kafada, yana sanye da baƙin gilashi waɗanda suka boye kumburin idonsa na kukan daren jiya, fuskarsa a murtuke tamkar bashi ne a kansa..

Master Ibrahim ya taka zuwa gaba, ya zare takobinsa ya ɗaga shi sama don kowa ya yi shiru. Shiru ya gauraye filin..

"Jami'an Alhamra! Na tara ku ne a nan don wata muhimmiyar sanarwa,"

Master ya faɗa cikin muryarsa mai kwarjini..

"Kamar yadda kuka sani, tsaro da adalci sune ginshikin wannan masarauta. Don haka, na zaɓi jami'i Inuwa a matsayin PA (Personal Assistant) na na musamman."

Wani gunaguni ya tashi a cikin jami'an. Wasu jami'an da suka daɗe a aiki suka fara kallon-kallo cikin bacin rai da hassada..

Master Ibrahim ya ɗaga hannu ya tsayar da su..

"Wannan ba zaɓi ne na kashin kaina kadai ba. Sarki ya aiko da yardarsa ta hanyar hatimin sa na musamman. Daga yau, Inuwa shine idona. Duk inda kuka gan shi, tamkar ni ne. Yana da ikon shiga kowane ofis, kowane kurkuku, da kuma kowane sashe na wannan fada ba tare da izini ba. Duk wanda ya raina shi, ko ya ki bin umarninsa, zai fuskanci hukuncin cin amanar masarauta!"

Master ya miƙa wa Inuwa wani